Page 94 - Entlebucher Brattig 2021

093 entlebucher brattig 2021

[Illustration: Pablo Meier]

Nachem Turne si d Froue gäng i Bäre oder i ds Chrüz ggange. Wenns gmüetlech gsi
isch, länger, süsch weniger lang. A däm Aabe hets länger dduuret. Ich ha scho töiff
gschlafe, wo mi öpper gmüpft und gfrägt het: «Hesch du äm Trudi dini Underhose
ggäh?» Ich has sofort zueggäh und biigfüegt: «Es het mer zwar strängstens befole, ich
söu lüge, aber du weisch ja: Ich cha nid!» D Paula het glachet: «Ds Trudi het bis äne
und use abgstritte, das du öppis dämit z tüe heigsch, aber ich ha zuenem gseit, ich
findi das i chürzischter Zit use, du biichtisch mier das i weniger as zäh Sekunde.»
A Schlaf isch im Momänt sowiso nid z dänke gsi, drum het mer d Paula verzöut, was i
de Turnhaue abglüffe isch: «Wi immer, si mer nachem Turne ga tusche. Normalerwiis
isch i de Tuschi eis Gläfer, aber hinecht isch‘s ruehiger gsi. Das isch mer aber erscht im
Nachhinein ufgfaue. Ich bi under d Bruuse gstande und ha ufpasset, das d Haar jaa
nid nass wärde. Ufdsmaau si die Wiiber iä cho, ds Trudi voruus. Das isch aber nid ganz
blutt gsi wi mier andere. Bis a eini hei au uf mich gluegt, und die eint – äbe ich – gseht,
das ds Trudi dini Underhose as Badhose aagha het. Das‘s möglechscht ächt usgseht,
het si vore ä Zitroneseifi abe gschoppet gha. Ich han ä Güüss usglaa und gar nid
gmerkt, das ich bockstüu stah blube bi und ds Wasser us de Düse vou uf mini trochne
Haar gsprützt isch. Ich bi deert gstande win ä Chatz, wo mer i ds Wasser gworfe gha
het. So lut ggüüsset und glachet isch i de Tuschi no nie worde. Die cheibe Mööri si aui
informiert gsi, was da söu abgah, nume ich bi so naiv gsi und ha nid ds Gringschte
gspannet gha!
Wenn i gwüsst hätt, was die Underhose mit de ufdruckte Rundumili fürnes Theater
würde aarichte, de hätt der sä nie kouft!»

Josef Ehrler, *1935, Marbach
pensionierter Sekundarlehrer