Page 92 - Entlebucher Brattig 2021

091 entlebucher brattig 2021

Underhose mit Blüemli

Josef Ehrler

Wär bi dere Gschicht nid es paarmaau mues lache, däm isch nümme z häuffe.

D Marbacher Turnerinne si ä verschworeni Gmeinschaft gsi. Gäng het öppis müesse
louffe, no meh nachem Turne as während de Üebige. Immer wider isch nä ä Streich i
Sinn cho, einisch hei si die probiert z verwütsche, es anders Maau ä anderi. Wichtig
isch gsi, das mer nachhär drüber het chönne lache.
Ou d Paula isch nid abgneigt gsi, i de vorderschte Reihe mitzmache, im Gägetöu. Aber
einisch isch ou si drachoo, und de no wie!

«Salü, Poula! Muesch di wäg mier nid verstecke!» het ds Trudi unde uä grüeft, wo d
Paula uf de Loube obe Wösch ufghänkt het. Zwöi Lintüecher hei sich bewegt, und d
Paula het de Chopf zwüschet füre gstreckt. «Was hesch Guets z mäude?», het si gfrägt.
«Gäu, das isch itz ou ä luschtige Aabe gsi vorgeschter. Han ich glachet ab dene Pro-
duktione! Aber de Vogu abgschosse het natürlech de Söpp mit sine Underhose.
Die wett i de no einisch nööcher gseh! Hesch sä scho gwäsche?»
«Nei, die chöme i de nächschte Chochete dra. – Aber, was isch los mit-der, Trudi? Sit
wenn bisch du ä Fetischist? He nu, wenn Fröid dra hesch … Ich tue sä de äxtra für dich
zvorderscht füre hänke, de chaisch sä de gschoue!»
«Prima! De chöme ou di härzige Rundumeli druf besser zur Gäutig. Vilicht gseh sä de
sogar vo däheime us, wenn i de Fäudstächer nime.»
«Auso Trudi, du bisch doch es Baabi! Hesch afe nümeh Gschiiders z tüe?»
Ds Trudi het glachet und isch gägem Dorf zue ga iichouffe.

Am Samschtig, zwe Täg vorhär, het d Harmoniemusig ä zwöitägige Usflug i ds Wallis
gmacht. D Musikantefroue – däzue hei ou d Paula und ds Trudi ghört – si säubver-
ständlech ou iiglade gsi. Am Namittag hei mer i de Bewohner vomene Autersheim es
Ständli brunge. Später hei mer imene Hotöu z Brig üsi Zimmer bezoge und am Aabe
imene grosse Saau Znacht ggässe.
Mitem Ässe wär ds offiziöui Programm vom erschte Tag z Änd ggange. Das het mi
gstört. «Was wei mer itz da grüppliwiis im Stedtli umezottle und nüt anders mache, as
i der einte Wirtschaft ä Zwöier Fendant, i der andere ä Drüier Johannisbärg und i de
dritte ä Haube Dole ga trinke!», han i ddänkt. «Es wär doch schöner, mer würd binen-
and bliibe und s zäme luschtig ha!» Drum han i de Vorschlag gmacht, es chönnti doch
jede Tisch öppis Luschtigs biete. Die Idee isch mit Begeischterig ufgnoh worde.
Nachem Dessert hets chönne losgah: Der eint Tisch het es Joduchörli zämegstöut,
vom andere hei es paar d Inschtrumänt ghout und zwöi-drüi Tänzli gstägreiflet. Es het
aber nid nume musikalischi Darbietige ggäh. Ou öppe ä Sketsch oder ä Pantomime
isch drunder gsi, zum Biispüu die, wo de Hansruedi vorgmacht het, wi es Puurli ä Chue
tuet mäle.