Page 99 - Entlebucher Brattig 2023

098

Was die Charte anere Expo i de Schwiz z sueche gha het, isch mier es Rätsu gsi. Wi si
d Russe däzue cho, vo de Schwiiz sone gnaaui Landcharte z drucke? Isch das e Wärbe-
Aktion vom Tourismus gsi, das mer Lüt us Russland zum Wandere im Äntlibuech und
Ämmitaau chönnt animiere? Auwäg chuum!
Bi eim Wort isch mi Experte nid druus cho und het mer wäge däm no telefoniert. So wi s
är übersetzi, heissi das «Schwellen», aber es gäig doch sicher kei Ort mit däm Name.
Uf mi Frag, wo de das stöig, het er gseit: «Z Wigge und gäg de Hüufere uä!» Ich ha
gnäujer uf d Foti gluegt und a de Üufis naa öppis ganz schwach aagschribe gseh, aber
blau und nid schwarz wi di andere Wörter. Ufdsmaau isch mer es Liecht ufggange. Ich
ha zum Dolmetscher gseit: «Du hesch scho richtig übersetzt, da si tatsächlech di grosse
Schwöue a de Üufis gmeint. A de Hüufere si s witer obe zum Töu richtigi Wasserfäu!»

Was mier ou no ufgfaue isch, si Näme gsi, wo mer bi üs ufere Landcharte vo däm
Massstab vergäbe würd sueche. Wär intressiert sich scho für Grauestei oder de
Furgge gütsch! Hei ächt die Näme öppis mitem Chrieg z tüe gha wi zum Biischpüu
Schibe- und Furgge gütsch. I de Schratte und im Hogant hets währetem Chrieg

mili tärischi Feschtige ghaa. Underem Hirschwängibärg und zwüschet Ämme und
Chemmeribodeflueh si mängi Reihe viereggigi Schachtdeckle z gseh gsi. Drinabe
hätt mer im Ärnschtfau Sprängstoff taa und notfalls d Strass i d Luft gsprängt, das de
Find nid dürecho wär. Mit dene Deckle si die Schächt wasserdicht abgschlosse gsi.
Scho längscht si die Aalage gsprängt worde. Bruchstück vo de Deckle mitem Name
ELKINGTON han i einisch am Rand vo der Ämme gseh umelige, won i vom Chemmeri-
bode gäg de Schönisei hindere gwanderet bi.
* * *