Page 97 - Entlebucher Brattig 2023

096

Chaute Chrieg?

Josef Ehrler

Эшолцматт Трубшахен

Шангнау Марбах Вигген

Was? Dier chöit das nid lääse? Dier müit die Wörter nume genau äsoo usspräche, wi si
gschribe si! Probierit! Wenn’s klappt, de wüsse aui, nid zletscht die usem Äntlibuech,
was dähinder steckt. Ich wette: di meischte, vilecht 99 Prozänt, wärde nid druf cho.
Es mues sich niemer schiniere, mier isch’s nämlech ou so ggange. Aber mi Gwunder
het mi däzue tribe, mich nöcher mit dere Sach z befasse. Und so isch die Gschicht
entstande.
* * *
A der Expo 2002 z Biel isch i eim Pavillon de Bode vonere riisige farbige Landcharte
abdeckt gsi. Sogar a de Wand naa obsi isch si ggange. Scho bim erschte Aablick han i
fesch gstöut, das vor mier d Gägend vom Thunersee übere Hogant und d Schratte bis i
ds Äntlibuech und Ämmitaau usbreitet isch. Marbach, Äschlismatt und Schangnou
si zimlech im Zentrum glääge, was ja süsch säute vorchunnt. Für die, wo ä weniger
gschuelete geographische Blick gha hei, isch aues aagschribe gsi: Dörfer, Flüss, Bärge,
ja sogar einzöuni Puurehöf.
Nume: Lääse het mers nid chönne.
Es het zum gröschte Töu Buechstabe däbii gha, wo‘s i üsere Schrift gar nid git. Män-
gisch hets eim ddunkt, bim Name vomene Dorf heige si oni Regle chliini und grossi
Buechstabe dürenand gwurschtlet. Ou d Zaau vo de Buechstabe het vüufach nid
gstimmt. Äschlismatt zum Biispüu het anstatt öuf nume acht gha, Marbach anstatt
sibe nume sächs, Wald hingäge füüf anstatt vier.
I de Täg nach üsem Bsuech a de Expo han i gäng wider a die Charte ddänkt. Leider
han i vergässe gha, e Foti dävo z mache. Mi Gwunder isch underdesse so gross
worde, das i zwe oder drei Wuche später extra no einisch a d Expo gfahre bi. I mim
Appärat hets no Platz für es paar Fotene gha. I ha de Füum grad gfüut und nä zum
Entwickle iigschickt.
* * *
Churz vor de Expo han ich mit minere Frou e Flussreis ufem Dnjepr vo Kiew nach
Odessa und uf d Haubinsle Krim gmacht. Deet isch aues i de gliiche Schrift aagschribe
gsi, wi mer uf de Fotene het chönne lääse, vermuetlech russisch. Ich ha mi erinneret,
das i z Langnou mängs Jahr vorhär än aute Bekannte troffe ha, wo deert si Land-
wehr-WK as Dolmetscher vom Russische i ds Düütsche gleischtet het. Ich han äm
drum die Fotene gschickt. Es isch nid lang ggange, han i e Zämestöuig vo wichtige
und weniger wichtige Näme ufeme Blatt vor mier gha.