Page 100 - Entlebucher Brattig 2023

099 entlebucher brattig 2023

De Name «Elkington» het mich ufdsmaau uf ganz anderi Gedanke bbrunge. Ich weis
nämlech, wo die viereggige Deckle fabriziert worde si: Z Ängland i de «Dover Enginee-
ring Works». De Bsitzer vo dere Maschinefabrik (wo natürlech ou «schwerers Gschütz»
gmacht worde isch) het Elkington gheisse, und dä Name het mer ufem Rand vo de
Deckle chönne lääse. Mi Frou Paula het bi de Famili Elkington z Dover ihres Ängland-
jahr absolviert und isch vom Mr. Elkington richtig verwöhnt worde. «Oh, Paula, you
are a good girl», heig er mängisch gseit. Si het äm aber ou jede Wunsch vo de Ouge
abglääse. Däfür het si einisch mit äm im «Bentley» dörfe uf London fahre. Und näbebii
het si no ganz es anders Erläbnis gha: D‘ Königin Elisabeth het i de Stadt Dover e Bsuech
gmacht. De Mr. Elkington het zu de «bessere» Gsöuschaft ghört und uf de Ehre tribüni
eine vo de beschte Plätze übercho. Zwe ganz hübsch kleideti jungi Froue si sini Beglei-
terinne gsi, näbet de Paula no Gisela, d Chöchi bi de gliiche Famili (ou e Schwizeri).
Die het mer chürzlech gseit, si zwöi heige ihri Ouge zwar meh uf de rassig Prinz Philipp
grichtet gha, ufe Maa vo de Queen. Zu de aaschliessende Fäschtlechkeite isch de
Mr. Elkington mit de gladne Geschte zrugg blube, und di beide «Ehredame» si älei
mitem Chauffeur heigfahre. Natürlech ou wider im «Rolls-Royce»!
Won ich es Jahr später mit de Paula Bekanntschaft gmacht ha, het ds Ehepaar Elking-
ton – beidi scho über 70 Jahr aut – unbedingt ds Paulas Fründ wöue gseh. Si hei üs uf
Wänge iiglade, wo si jede Winter Ferie gmacht hei. Für Reis, Mittagässe und Fahrt ufe
Männleche han ich ds Portmonee nid müesse füre näh. Ich bi sicher, de Mister und d
Missis Elkington hei gseh, das d Paula i guete Hände isch. Fascht 60 Jahr lang, bis zu
ihrem Tod, isch si do miis «good girl» gsi.

* * *
Nid nume d Tankspeerene hinderem Chemmeribode, nei, ou d Schwöue a de Üufis
hei mer nid zum Chopf us wöue: Wiso chöme d Russe däzue, das Wort uf ne Schwizer
Landcharte z schribe? – Guet, ou i de Schwiz wärde Charte vo frömde Ländere druckt! –
Aber «Schwöue»? Das Wort findt mer nid ämaau uf üsere 25 000er-Charte! Chönnt‘s
ächt mit de Tankspeerene e Zämehang ha? Wär weiss, vilicht het mer wöue e Hiiwiis
druf gää, das mer deet mit de Panzere nid cha dür ds Flussbett uf fahre.
Öppis nimmt mi i däm Zämehang bsunders wunder: Das mer di grössere Ortschafte
ufere Charte iitreit, isch jedem klar. Aber näi mer zum Biispüu «Grauenstein». Wiso steit
de Name vomene ganz «normale» Puurehof ufere russische Landcharte? Aha, deet i de
Nöchi, öppe 100 Meter ob de ehemalige Grasteeri, isch doch e Hof und ganz am Bärg
aa e chliineri Schüür miteme grosse Tor. Dür die Schüür cha mer ine Feschtig fahre, wo
Hunderti vo Persone und Proviant für mänge Manet dinne söue Platz haa, däzue natür-
lech ou e Huuffe Materiaau. Die Feschtig isch etlechi Jahr nachem Zwöite Wäutchrieg
bbout worde, auso währetem Chaute Chrieg. Für d Schwizer ischs zu dere Zit strängsch-
tens verbotte gsi, im Zivil über die Aalage z rede. Aber wär e chli druus chunnt, dä weis,
das i de ussländische Gheimdienschte sowiso aues bekannt gsi isch, was mier chrampf-
haft gheim ghaute hei.
Het auso die Landcharte sogar öppis mitem Chaute Chrieg z tüe? I dene Täg, wo d Russe
i de Ukraine e «heisse» Chrieg aazettlet hei, isch die Frag nid ganz abwägig. Ou deet
bruuche si Charte, das si sich chöi orientiere. Und no öppis: Bevor d Sowjetunion ufglöst
worde isch, hei d Russe eigentlech ganz Weschteuropa im Oug ghaa.
Hei ächt d Russe ou söttigi Charte bruucht, wo si im Früehlig i de Ukraine iigmarschiert si?
Das nähm mi scho no wunder.

Josef Ehrler, *1935, Marbach
pensionierter Sekundarlehrer